Mananagat nabungkag

NABUNGKAG ang lawas sa usa ka mananagat dihang nabuthan sa dinamita nga iya untang ilabay sa mga isda samtang siya nanagat uban sa iyang asawa ug anak sa kadagatan sa lungsod sa San Remegio, Sugbo.

Ang biktima daling nidagkot og dinamita sa dihang iyang nakita ang bagang duot sa isda apan nibuto kini sa iyang kamot.

Si PO3 Joe Johnnesski Inot nga nahinabi sa Sun. Star Superbalita niila sa namatay nga si Nicandro Jugan Piañar, 35, minyo, taga barangay Tacub.

Si Piañar niadto sa kadagatan sa ilang dapit pasado alas 12 sa udto niadtong Martes alang sa pagpanagat uban sa iyang asawa nga si Gina ug sa iyang sinagop nga bata sakay sa ilang pumpboat.

Ang mananagat nagdala og dinamita.

Samtang nanagat, nakit-an ni Piañar ang bagang duot sa mga isda hinungdan nga dali siyang nikuha og dinamita ug giduslitan.

Apan wa pa gani malabay ang dinamita ug diha pa sa iyang kamot nibuto na kini nga niresulta sa pagkamatay niini dihadiha.

“Naguhayguhay gyud ang iyang kamot. Iyang lawas nabungkag. Grabe kuno kaayo,” asoy ni PO3 Inot.

Hinuon ang iyang asawa ug ilang sinagop wa maunsa apan nangahulog sa dagat ug giluwas ra usab sa mga mananagat nga diha sa duol.

Gibutyag sa kapulisan sa San Remegio nga aduna gyuy illegal nga managat sa ilang dapit gamit ang dinamita apan di kini lumolupyo sa ilang lugar.

“Kini gyung sa amo diri sa San Remegio daghan gyod nig isda diri. Naay maggamit og dinamita pero di taga diri. Ambot ngano to siya nga nigamit og dinamita natintal ra gyud to siya siguro,” dugang ni Inot.

Nagtuo ang mga pulis sa San Remegio nga posibleng di anad sa paggamit og dinamita ang biktima o kaha posibleng mubo kaayo ang pabilo hinungdan nga dali rang nibuto.

Niadto gihapong Martes usa usab ang patay didto sa dakbayan sa Lapu-Lapu human madat-ugi sa dakong bato nga nabuak tungod sa ilang illegal nga panagat gamit gihapon ang dinamita.

Hybrid seeds di moturok; mga mayor `nalipat’ sab

NAKAPAHIMULOS ang daghang mga mag-uuma sa hybrid seeds nga gipanghatag pinaagi sa “Masaganang Ginintoang Ani” program apan di na sila modawat niini kon hatagan sila og usab kay di moturok.

Nireklamo sab ang mga mayor kay wa una iagi kanila sa Dept. of Agriculture ang pagpang-apod-apod kay gidiretso ngadto sa mga municipal agriculturist.

Kini ang gipahibawo ni Asturias Mayor Allan Adlawan kansang lungsod lakip sa pito ka mga dapit nganhi sa lalawigan sa Sugbo nga nakatagamtam sa programa sa DA.

“Di dawaton (sa mga mag-uuma) og manghatag og usab kay di man moturok,” butyag ni Adlawan human iyang nahinabi ang farmer beneficiaries nga gipanghatagan sa hybrid seeds.

Iyang gihulagway nga peke ang mga semilya nga gipanghatag sa ilang mga mag-uuma apan niabot gyud sa Asturias.

Gani, matumbok niya ang mga mag-uuma nga nakapahimulos niini ug dugay na kining naimplementar sa ilang lungsod.

Si Adlawan nipahibawo nga atol sa food caravan nga gipahigayon sa DA didto sa lungsod sa Balamban, iyang gipaabot kining nasinati nga kahasol sa mga mag-uuma sa ilang programa.

Gawas niini, giingnan niya ang mga representante sa DA nga pahibaw-on sila sa ubang mga programa sa ahensya aron makatabang sa pagpatuman niini ug di idiretso ngadto sa ilang mga municipal agriculturist.

“Gidiretso man na nila (ang mga programa) sa municipal agriculturist sa lungsod. Wa na moagi nato mao mostly sa mga mayor nalipat,” matod ni Adlawan.

Gikataho nga si Balamban Mayor Alex Binghay namahayag usab nga ang mga hybrid seeds nga gipanghatag sa DA di na puwede itanom.

Wa mahimuot si Binghay sa pamahayag sa ahensya nga di na puwede ang mga hybrid seed kay ang mga mag-uuma wa gilayon nitanom niini.

Si Adlawan niuyon sa pamahayag ni Provincial Board Member (PB) Member Wilfredo Caminero nga kanhi mayor sa lungsod sa Argao nga wa makauyon sa programa sa DA kay way kasabutan nga napahigayon tali sa ahensya ug sa kalungsoran nga maoy mopatuman unta sa programa.

Nitataw si Caminero nga kon tinuod ning alegasyon sa programa, lain na usab kining pag-usik usik sa pundo sa gobyerno nga maapektuhan ang mga mag-uuma sa lalawigan. (JECT)

Soc mihangyong Perigo di ilisan

NISUWAY si Mayor Socrates Fernandez sa paghangyo sa Cebu Provincial Police Office (CPPO) nga ipabilin lang sa Talisay City police station si Supt. Romeo Perigo isip hepe tungod kay natagbaw siya sa performance niini.

Apan si Director Carmelo Valmoria dali nga nipasabot ni Fernandez nga gikinahanglan na kaayo nga ibalhin si Perigo tungod kay nilapas na kini sa duha ka tuig isip hepe sa Talisay.

Tungod sa katarungan ni Valmoria, si Fernandez niklaro nga di tungod sa kahimtang sa kahusay ug kalinaw sa siyudad ang hinungdan sa pagrelibo kang Perigo.

Si Perigo sa wa pa mobiya sa Talisay, nihimo kini og courtesy call kang Fernandez ug nanamilit.

Atol sa ilang panag-estorya ni Perigo, ang mayor nanawag dayon kang Valmoria aron pangutan-on sa hinungdan nga pagrelibo niini.

Si Fernandez niklaro hinuon nga wa siyay pagsupak bisan kinsa pa ang ibutang sa CPPO nga hepe sa Talisay.

Ang CPPO gitakda nga mopadala og tulo ka mga ngalan sa opisyal nga papilian kang Mayor Fernandez.

Nunot sa pagkarelibo kang Perigo, si Fernandez nimando sa kasamtangang hepe nga si P/Senior Inspector Jovito Canlapan nga hingpit nga ipatuman ang balaod batok sa mga makalapas.

Lakip sa gipahingusgan sa mayor mao ang kampanya batok sa illegal nga drugas. (VLM)

Tony gihinginlan ni Tom

TUNGOD sa iyang pagsuporta sa Banawa Separation Movement, si Kong. Antonio Cuenco (Cebu City, south) ingon sa nibuwag na gyud gikan sa administration party.

Kagahapon, si Mayor Tomas Osmeña nipalagpot gyud kang Cuenco gikan sa Bando Osmeña Pundok Kauswagan (BOPK).

Ang kanhi kaalyado sa pulitika, matod ni Osmeña, “doing the right thing for the wrong reason” sa pagduso og balaudnon nga magbuwag sa Banawa ug Englis gikan sa Barangay Guadalupe aron mahimong laing barangay.

“As far as I am concern, he is not part of the BOPK (anymore),” matod ni Osmeña sa mga reporter kagahapon.

Siya nagkanayon nga bisan kon maayo ang intensyon ni Cuenco, ang motibo sa iyang aksyon kadudahan, kay ang kongresista hayan igo lang nibawos kang Guadalupe Barangay Captain Eugenio Faelnar, suod nga higala sa mayor.

“He just wants to get even. He does not care about them. The question is how do you have a seamless transition? But he doesn’t care,” matod ni Osmeña.

Sa laing interview, si Cuenco niingon nga wa niya igsapayan nga gipalagpot siya sa partido, ug hayan kini “blessing in disguise.”

“I have other plans anyway,” matod niya sa interview sa telepuno sa Sun.Star.

Iya hinuong gipanghimakak nga wa niya isipa ang kaayuhan sa mga lumolupyo sa bag-ong barangay, labina sa paghatag sa basic services, dihang siya nipahibawo niini.

Siya nagkanayon nga dunay mga probisyon nga maglakip nga ang pagbahin mahitabo lang human sa usa ka eleksyon.

Sukwahi sa iyang gipahibawo nga iyang iduso ang balaudnon sunod semana, siya niingon nga makigsulti una siya kang Bise-Mayor Michael ug Rama ug sa mga konsehal sa siyudad.

Iyang gihagit ang City Government, labina ang City Council, sa pag-update ug pag-reenact sa 1997 resolution nga nagtugot sa pagpahigayon og plebisito ug mogahin og P100,000 nga pundo alang sa mao nga katuyoan.

Si Cuenco niingon nga makigsulti una siya kang Rama kay ang pag-reenact sa resolusyon mao ang labing dali ug labing mubo nga proseso.

Si Rama, sa iyang bahin, niingon nga ang labing maayo gyud unta nga serbisyuhan og tarong ang duha ka mga sityo.

Matod niya nga mas maayong magbutang og satellite office ang Guadalupe sa mao nga dapit nga dumalahon ni brgy. konsehal Henry Cañete.

Nisaad hinuon si Rama nga iyang ipasusi ang daghang mga dokumento kalabot ning pagbuwag sa Banawa ug Englis nga natuki na katuigan ang nakalabay. (RHM sa Sun. Star Cebu)

Ruiz: di angay magbasulay; Roderos miandam og ngan

DI angay nga magtulodtulod sa responsabilidad ug magbasulay sila si Mayor Jonas Cortes sa Mandaue ug Senior Supt. Rodel Calungsod, hepe sa kapulisan sa siyudad.

Sugyot ni Kong. Nerissa Soon-Ruiz (Cebu 6th district) nga ang maayong buhaton mao nga lingkoran sa duha ka mga opisyal ang suliran sa pagsaka sa kriminalidad sa maong siyudad.

Si Ruiz niingon nga kining iyang reaksyon iyang gipadayag isip nagpakabana kay siya Mandauehanon.

Sa sayo pa, ang panagbangi sa mga opisyal sa Mandaue ang usa sa gibasol nga hinungdan ngano nga wa maatiman sa siyudad ang kapulisan.

“The police should not attribute the political squabble of city officials as the cause of its failure because it is even in a better position to do more this year,” matod pa ni Ruiz.

Si Calungsod, sa meeting sa Regional Peace and Order Council (RPOC) nga gipangulohan ni Gobernador Gwen Garcia, nibasol sa kakuwang og mga sakyanan nga maoy hinungdan sa pagsaka sa kriminalidad.

Iya ning tubag sa pangutana ni Garcia kaniya.

Human masayod si Cortes, nasuko siya og maayo ug iyang pahulipan si Calungsod.

Matod sa mayor nga sa iyang administrasyon, iyang gipahuwaman ang mga sakyanan sa City Hall ngadto sa kapulisan aron magamit kini.

Gawas pa kini sa laing mga sakyanan nga ilang gihatag ngadto sa Mandaue City Police Office (MCPO).

Nitambag si Ruiz ngadto kang Calungsod nga doblehon niini ang ilang pagpaningkamot kutob lang sa ilang maabot aron mapatunhay ang kahusay ug kalinaw sa maong siyudad.

“This is not the time to play the blame game, as most other officials do, this is the time to work together for the common good of Mandaue city,” dugang pa ni Ruiz.

Nitambag usab siya kang Cortes nga tigumon ang Mandaue City Peace and Order Council aron tukion ang suliran sa kahusay ug kalinaw sa siyudad.

Samtang, ang director sa Police Regional Office (PRO-7) aduna nay pito ka ngan sa opisyal nga giandam kon papahawaon si Calungsod sa MCPO.

Si PRO-7 Director Chief Supt. Ronald Roderos niingon nga paabuton lang una nila ang pormal nga suwat ni Cortes una pa nila himuan og aksyon.

Matod niya nga kon aduna nay suwat ang mayor, mahimong makapili siya sa pito niya ka mga opisyal nga anaa karon sa PRO-7.

Apan gitataw ni Roderos nga atol sa ilang meeting sa RPOC wa gayod motumbok si Calungsod nga ang hinungdan sa pagsaka sa kremin sa iyang siyudad tungod sa panag-away sa mga opisyal, apan nisulti kini nga usa lang sa mga hinungdan. (DRT)

Babaye molayat na unta sa Mactan bridge

BABAYENG menor de edad moambak na unta sa unang Mandaue-Mactan bridge niadtong miaging gabii.

Maayo gani kay nakuptan siya sa usa ka pulis nga nitubag sa alarma human sila tawgi sa usa ka sikyu nga nakabantay sa di maayong lihok sa teenager.

Ang problema sa pamilya maoy gitumbok nga rason sa babaye ngano nga buot siya nga magpakamatay.

Kini nahitabo alas syete pasado sa gabii niadtong Dominggo sa Mactan Bridge habig sa Mandaue City.

Ang maong teenager nga naluwas mao si “Gretchen,” 17, taga Agos, siyudad sa Lapu-lapu.

Ang security guard nga si Anay Nemecio nga nadestino sa taytayan maoy unang nisumbong sa kapulisan sa Presento 5 sa Mandaue City Police Office (MCPO).

Namatikdan ni Nemecio nga kadudahan ang panglihoklihok niini sa dihang naglakaw paingon sa tunga-tunga sa maong taytayan.

Tungod sa iyang kabalaka, nanawag gilayon siya sa kapulisan.

Si PO1 Bandolon Pasaylo uban sa iyang mga kauban ningresponde sa alarma.

Ilang naabtan si Gretchen nga nagtindog na sa tampi sa taytayan.

Ila kining giduol ug gipakigsultihan aron pagkombinser niini nga di dayunon kon unsa man ang iyang plano.

Apan, wa maminaw ang 17-anyos, molayat na unta siya sa bridge apan maayo gani, dali kaayo siyang nagunitan ni Pasaylo ug ila dayon nga gitabangan sa pagkupot.

Ila kining gidala sa Presento 5 aron maimbestigar.

Atol sa imbestigasyon, ang batan-on niingon nga wa na siya makaaguwanta sa iyang problema human magbuwag ang iyang mga ginikanan ug naundang siya sa pagtungha.

Si Gretchen gitugyan sa kapulisan sa Mandaue ngadto sa Womens Desk sa Lapu-lapu City Police nga maoy dunay jurisdiction kaniya.